Um was gahts?

Sit ich min Hund (Monty) vo Puerto Escondido-Mexico zu mir id Schwiz gholt han, verfolgt mich d`Frag: „Was für e Rasse isch wohl min Liebling? “ Au bim Spaziere, trifft mer immer wieder uf anderi „Hündeler“. Die stelled au immer die gliche Frage. „Was isch den dine für eine?“ „Er gseht nöd us wie vo da?“ „Isch er vo de Strass?“

Ich chan uf jede Fall verstah, warum die Frag immer wieder uftaucht. Schlussendlich gseht er nöd us, wie e europäischi, standart Rasse. Er het viel körperlichi Merkmal, wo mit vielne verschiedene Rasse korreliered, was D`Lüt mengmal fragendhinterlaht.

Isch de Monty e Vizsla-Mischig? Viellicht e Stafford-Mischig? Er muess doch öppis vomne Labrador ha, oder? Überlegige wo ich mir sehr oft mache.

Und wie usefinde?​

Ich has genau welle wüsse. Nach Recherche und Rücksprach mit andere Fründ:inne bi dene die glich Frag druckt, bin ich uf e Site Namens Embark gestosse. Endlich hani  D`Chance entdeckt, usefinde was er jetzt würklich für e Mischig isch.

Uf de Website, han ich mir den es DNA Test Kit bstellt, wie er da une uf em Bild gsehnd. Wo er acho isch, hemmer am Monty dörfe Speichel abneh. Es het mich ehrlichgseit grad es bizeli a die Corona Test Set erinneret. Es chunnt miteme Stäbli, welles mer den es paar Mal im Mul vom Hund vorsichtig dreht und den sicher verpackt, de Embark Firma zrugg schickt. Ihres Labor befindet sich i de USA, umso schönner isch, das s`versende bereits im Pris beinhaltet isch. Dementsprechend sind Test Ergebnis ca 4 Wuche spöter per Mail-PDF zrugg zu mir cho.

D`Resultat​

Wo ich D`Resultat becho han, bini doch sehr überrascht gsi…

und so gesehnd die 3 verschiedene Rasse us.

Aber was isch den jetzt genau en American Village Dog?

Während die meiste Menschen Village Dogs eifach als es witers Fragezeiche i ihrer Suechi nach meh Informatione über ihri Hünd betrachted, isches für mich ade Zit gsi, witer z`recherchiere.  Village Dogs mached weniger als 1% aller uf Embark getestete Rasse us, was bedüted, dass Min und Din Village Dog ziemlich einzigartig isch. 

Gschicht.

Village Dogs sind Hunderasse wo vo de „Kennel-Clubs (Hundezüchtervereine)“ nöd anerchännt werdet. Trotzdem sind sie tatsächlich e eigene Rasse und nöd wie viele meined eifach en Streuner. 

Sie sind weder vo Mensche erschaffe worde – wie anderi rein-rassigi Hünd, no sind sie verwilderet oder domestiziert. 

Und wie chönnt mer sie susch definiere?
Es anders Zitat vom Adam Boyko erchlärt, wie mer sich en Village Dog vorstelle chan. 

Laut Adam Boyko (Experte für Hundegenetik) : haben Village Dogs „etwas Ähnliches wie natürliche Selektion, allerdings in einer von Menschen bewirtschafteten Umgebung“. 

Also mit andere Wort, sind sie e Mischig us de Mensche igfüehrte Hustierrassene und de alte Pariah- / Wildhünd vo de Umgebig. Vieli Village Dog Populatione existiered bereits vor de Entstehig modern züchtete Rasse und hend (genetisch) viel über d`Gschicht vo Hünd i bestimmte geografische Gebiet z`verzelle. 

Ähnlich wie bi Hunderasse, wo durch jahrelangi Zucht entstande sind, sind sich Village Dogs immer relativ ähnlich im Usehe.

Egal wo mer sie entdeckt – obs en amerikanische, afrikanische, oder ostasiatische Village dog isch, vermehrt hend sie gmeinsami Merkmal wo für ihri über Rasse spreched.

Aber Wie und Wieso? 

Anstatt das d`Hünd vo Zuchtene und Mensche gformt werdet, het die natürlichi Selektion da de Job übernoh. Usgstattet mit churzem Fell, oft ufrechte Ohre, schmale Chöpf und schmale Statur, verkörpered sie en „Scavenger“. Mengisch (und gar nöd mal so selte) sind sie d`Begleiter i de Menschliche Gemeinde, mit dene sie historisch verbunde sind. 

Was chömmer us Village Dogs lerne?  

Viellicht sind es paar enttüscht, wenn sie nöd die Rassezemmesetzig becho hend, wo sie erwartet hend, aber mer cha sich sicher sie, dass wenn mer en Village Dog het – mer en Teil vo de Hunde Gschicht bi sich dihei het! Village Dogs sind genetischi Ressource, die eus helfe chönd, d`Hundeentwicklig i vielne Bereich uf de Welt es bitzeli besser z`verstah.